Linguamón - Casa de les Llengües e era Universitat Oberta de Catalunya (era universitat virtuau catalana) vien de crear era cagira Linguamón - UOC de multilingüisme, que ges dera convencion de collaboracion signada eth 21 de deseme de 2006 pes dus arrepresentants d’aqueres institucions, era arrectora dera UOC, Imma Tubella, e eth director de Linguamón-Casa de les Llengües, Antoni Mir.

Objectius

Era cagira fonamente activitats d’arrecèrca, formacion, informacion e documentacion sus eth multilingüisme coma mejan de desvolopament sociau e economic. Entà arténher aqueri objectius, era cagira que vò èster un espaci de reflexion e analisi interdisciplinària sus eth ròtle des lengües e eth multilinguüisme en procès de mondializacion dera societat. Que propòse tanben er encastre de cooperacion internacionau de besonh entara formacion academica en aqueth airau. 

Dera madeisha manèra, que vò èster un organisme capable de generar, propagador de coneishement, capable de facilitar mecanismes generadors de cambiament qu’agranisquen es beneficis deth multilingüisme, e un estrument entà estimular era collaboracion entre cercaires de naut nivèu e de prestigi internacionau, docents universitaris e arrepresentants de d’auti organismes. 

Conselh director

Eth Conselh de Direccion dera cagira va a èster composat per quate arrepresentants dera UOC e per dus membres dera Casa de les Llengües. Eth director des Estudis d’Umanitats dera UOC, Isidor Marís, qu’ei eth director dera naua cagira e Miquel Strubell, actuauments professor des Estudis de Lengües e Cultures, n’ei eth secretari. 

Isidor Marí que siguec professor dera Facultat de Filosofia e Letres des Baleares. Entre er an 1980 e eth 1996 qu’aucupèc cargues en Govèrn de Catalonha, coma es de cap deth Servici de Consultacion Lingüistica (1980-1988) e subdirector de Politica Lingüistica deth Govèrn de Catalonha enquiar an 1006, qu’entrèc ena Universitat Oberta de Catalunya.

Miquel Strubell que siguec cap deth Servici de Normalizacion Lingüistica dera Generalitat de Catalonha er an 1980. Dempús que siguec director der Institut de Sociolingüistica Catalana, secretari deth Conselh Sociau dera Lengua Catalana (organisme d’assisténcia, consultacion e participacion sociau ena politica lingüistica dera Generalitat de Catalonha) e vicepresident Consorci per a la Normalització Lingüística, er organisme que veile per usatge deth catalan en toti es domenis dera societat, enquiar an 1999 qu’entrèc coma professor dera UOC.  

Arrecomanacion dera Comission Europèa

Era creacion d’aguesta cagira que seguís eth nau encastre estrategic entar multilingüisme que propòse era Comission Europèa [COM (2005) 596 final]  Era comunicacion que demane as govèrns estataus, regionaus e locaus qu’adòpten mesures peth multilingüisme e, entre d’autes actuacions, propòse que se creen estudis sus multilingüisme en un modèl de cagires sus era diuersitat lingüistica.