Ilsan Umarikan msettafent x tlata n familiyat d timeqranin:

• Tamirindyant/amérindien
• Tana-dinit/na-dene
• Taskimu-aliwtit/eskimo-aleutien

S tlata kkint-id zi tlata n remwaj inetlaâ id-yudfen ar umenz’aw zi lbughaz/détroit  n Biring 18.000 iseggwusa zi wami, amux nnan imerzuten itwassnen att’as. 

Familiyat-a s tlata mmebd’ant x watt’as n waggayen msebd’an mseqqem:

Tamirindyant d nettat d familya ig immez’len ktar di tmurt, minzi d nettat ig immebd’an x uzgen ameqran n ilsan: day-es ci n 600 n ilsan iyalsqen ar ktar zi 100 n waggayen.

Tamez’la-ya temsar-as i tmirindyant s tnayen n lesbab: tamurt mani tella temghar att’as, tett’ef marra Amarikan n Wadday , Amarikan n Wammas d watt’as zeg Umarikan n Ugafa (kkes ghir imukan itwah’arren zi familyat tilsawanin nned’ni), d waggwaj jar aggayen n iwdan umenz’aw.

Ar ugafa umenz’aw, nettaff aggay algunki,  min ghar qqnen ilsan amaknaw tarapahut/arapaho, taciruki/cherokee, d tadakutit/dakota. Di wammas nettaf aggay utuastiki/utoastèque,  min ghar qqnen ilsan amaknaw, takumancit/comanche, tanahuwatlt/nahuatl. Di tfughalt tandinit (n idurar n Andes) nettaf ils anesli issawalen azgen ameqran n iwdan n umenz’aw, takitcuwat -min ghar llan ca n 10 melyun n imessawalen-, sebla taymarat d tamaputcit. Tagwaranit d tatupit qqnent ghar waggay akwaturi-tukani. X tmawin n usif n Amazun dini aggayen ge, panu d karib.  Ilsan i ghar-sen iqqnen ssawalen-ten drus n iwdan amaknaw tamadijat/madija (ge), tamarubut/marubo (panu) d tapanarit/panare (karib).

Familya wis tnayen, tana-dinit/na-dene,  tett’ef Alaska d az’elmad n Kanada. Sebla ilsan iggwjen, yudef day-es waggay atapaski/atapascan , min ghar qqnent tanavahut/navaho d tapatcit/apache d ca nned’ni.

Deg umeggaru, nettaf familya taskimu-aliwtit,  tett’ef agafa n umenz’aw zi Alaska ar Grinlandiya. Aggay askimal day-es ilsan amaknaw tinwit/inouit d tiwpikt/yupik.

Tamez’la-ya tilsawant tameqqrant umarikan tenqes umi id-yusa Colom aseggwas n 1492, d wami bdan tsuggan x umarikan. Ijj n lmital x mana-ya, ijj n zman di brazil ira din 1.200 n ilsan. Id’a din ghir 170, azgen ameqqran nsen aqqa-ten x ubrid ad qd’an.

Tagwaranit d ils amirindyan amcum ig itwanesben deg wanak amirikan: di Lparagway.

Ilsan nned’ni ma ur llin d unsiben ma d unsiben ak ilsan nned’ni, amaknaw takitcuwat nigh tayamarat di lpiru. Marra iwanaken imirikanen ghar-sen ilsan nned’ni d unsiben, wwin-ten-d irupawiyen umi i-d suggen x umarikan: taspanyut, taglinzit, tafransist, tapurtugit d tanirlandit.

Irupiyen wwin-d ssin ula d lghillet ur itwasnen di urupa d ismawen nsen. Amakanaw  batata (zi tkitcuwat) nigh tumat'ic d tcukulati (zi tnahwatelt), d ismawen n luh’uc amaknaw piranha (zi ttupit), d watt’as n wawalen nned’ni amaknaw urakan (zi ttaynut) nigh d anurak (zi tinwit), d ca nned’ni.