Di Asya, ssawalen ca n 2000 n ilsan munen di watta’s n familyat tilsawanin, ca n ilsan nettaff-iten ghir  deg umenz’aw n Asya, maca inned’ni llan deg umenz’aw n Asya d imukan nned’ni n umadal. Inni nettaff ghir deg umenz’aw d:

• Familya taltaykit/altaïque, tesmun ilsan amaknaw taturkit, tamungulit nigh d tamanxut/manchou.
• Familya tadravidikit/dravidique, illan di lhind n wadday d Sri-Lanka, day-es awalen amaknaw tatamilit nigh tamalayalamt.
• Familya tasinutibitant/sinotibetane, tesmun tacinwit, tabirmant d tatibitant.
• Familya tawstrusyatikt/austroasiasiatique, tesmun tavitnamit, talawsiyat/laosien nigh taxmirt/khmer. Ca n imuray ssalsaqen-t ar tawstrunizikit/austronésique d tadaykit/daïca (tataylandit), qqaren ixessa ad ilint marra deg ijj n waggay d ameqqran, aggaw awstri.
• Deg umeggaru, nettaff ilsan itcuktci-kamcatkiyen/tchuktchi-kamtchatka, illan x ubrid ad qd’an.

Familyat ig ucin i barra n umenz’aw d:

• Tafrusyatikt, di familya-a, d taârabt ig illan d asghun n Asya ak Afriqya.
• Tahindurupit, day-es ilsan amaknaw tafarisit, takurdit, tahindit, tabinghalit, turdut, tapayctut/pashto, tanipalit, d ca nned’ni, ak familya turalikt - tusit/ossète, tamansit/mansi, tacantit/shanti - , llant d asghun alsawan n iqqnen Asya ak Urupa.
• Familya taskimuliwtit - iyupik/iupik - teqqen Asya ak Umarikan.
• Tawstrunizikit tesmun ilsan amaknaw tandunisit, tamalayt, tatagalut/el tagalog nigh tajavanit, d ca nned’ni, tteqqen amenz’aw asyawi ak Usiyaniya.

Bla ilsan isettfen di familyat tilsawanin, din ca n ilsan nned’ni ur-d teânin i wayawya, amaknaw tajapunit, takurit, taynut/aïnou, tagilyakt/guiliak, nigh d taburuycaskit/el buruchaski.

Min it-iqqimen d amd’an n ilsan-a d imessawalen nsen, mkul leâjeb illa di wmenz’aw asyawi. Nzemmar ad naff ilsan min ghar llan ghir imessawalen imeggura, amaknaw ca n ilsan n Sibirya, d ilsan min ghar llan azgen ameqran n imessawalen deg umadal, amaknaw tacinwit nigh d tahindit. Ixessa ad nessen ira tlata n ilsan zi xemsa min ghar llan att’as n imessawalen deg umadal-tacinwit, tahindit d tbinghalit- llan di Asya.

Ilsan unsiben n Asya d ilsan n illan d inesliyen di wezgen ameqran n iwanaken ines. S manaya minzi nettaff att’as n ilsan n tmurt aqqaten x ubrid ad qd’an s ssebbet n ilsan inesliyen ur illi s ssebbet n ilsan imsuggen, amuk imsal deg imenz’awen nned’ni. Waxxa amya, din iwanaken mani llan d unsiben ula d ilsan amaknaw taglinzit d tefransist. S manaya taglinzit d ils unsib wis tnayen di watt’as n iwanaken amaknaw Lhind, Pakistan d Singapur, tafransist d ils unsib wis tnayen  di Kambudj, Vietnam d ca n iwanaken nned’ni.

Ilsan isyawiyen ucin att’as d awalen i yilsan umadal, zzay-sen  atay (zi tcinwit),  tcampun (zi thindit), mangu (zi ttamilt), karambula(zi tmalayit), kaki (zi tjapunit), tt’aset (zi tfarisit), kiyusk (zi turkit), panda (zi tnipalit), mamut (zi tusit), bla ca nned’ni.