Melmi nessawl x ilsan n yill agrakal, ixessa d amezwaru, ad nuc ijjt n tewsift x uxd’ar i tegga Linguamón-Taddart n Ilsan i taffa-ya n isefkan..

Ilsan igha d-ttaffem di texxamt-a mmebd’ant x tnayen n ih’dran d imeqranen:

• Ilsan n tmurt id-yusin x tma n yill agrakal
• Ilsan issawalen id’a deg ill agrakal, s ssebet n min imsaren deg umezruy.

Mala newwi x manaya, ilsan amaknaw tagayigut nigh tabritunt ur qqinen ca ar ill agarkal, minzi ssawalen-ten deg ca n imukan ur id-usin x tma n yill, waxxa ssawalen-ten di tnayen n iwanaken d igrakalen, n illan d França d Spanya.

Maca, nettaff ilsan amaknaw taglinzit llan di taffa nnegh isefka, minzi min imsaren deg umezruy iga zzay-es awal unsib n Malta d Jbelt’ir.

Mala nez’ra tusnakal, temsaggaren deg ill agrakal tlata n familiyat d tilsawanin:

1. tahindurupit, mindi llan ilsan irumanen, islaben imiridyanen, tayunanit d talbanit.

2. tafrusyatikt, llan day-es ilsan isimitiken (amaknaw taâibrit d teârabt qqaâ ktar) d tamazight nigh tabirbirt (iklusa n wawalen i day-es illan).

3. taltaykit, tecneâ day-es qqaâ ktar taturkit.

Amezruy alsawan n ill agrakal imeyaggel att’as , minzi, zeg ijjt n jjihet, iâqel i isuggan ilsawanen d imeqranen – wenni n tlatint d wenni n teârabt-, zi jjihet nned’ni, itwah’sab d lmital x umâayac n tghiwanin tilsawanin msebd’ant att’as jar-asent.

Amaknaw marra ilellen n umadal, tikri tabh’rit ig imsaren deg ill agrakal, tenfeâ di wexraq n wemsawad’ jar ayduden mmezlen att’as. Amsaruf-a ijja limart ines di watt’as n imukan n umadal.

Ad nuc lmital x manaya: tagrikit day-es att’as n wawalen amaknaw catalogue/akatalug, diamant/dyamand, tragédie/arubi, awalen-a ssexdamen-ten ilsan ur llin zeg ill agrakal. X ubrid n tegrigut, tadelsa tamis’rit tessiwd’ i wmadal awalen amaknaw papyrus (awal manis i d-yusa papier) nigh pyramide/lharam. Att’as n ismawen n luh’uc illan id’a deg imawalen n wezyen ameqran n ilsan n tmurt, kkin-d ula netnin zi tegrikitt: baleine/bayyina, chameau/alghem, crocodile/ttimsah’, dromadaire/alghem n lexla, autruche/nnaâama, hippopotame/iyes n ighzar, léopard/aghiras, rhynocéros/n ijj n wacc, tortue/ikfer...bla awalen n yalsqen ar tudart n âla h’al (corde/asghun, nigh sandales/tigharsin), tagrikit id’a âad d ijjt n tala mani-s id tekken awalen imaynuten, awalen ittwasenâen d wawalen ittwaxerqen zi tlatint nigh d tagrikit, awalen-a neqqar-asen itraren (ttilifun, lmitafiziqa  etc.).

Talatint, ils n yill agrakal, ula d nettat temsar-as amaknaw tagrigut, tella d ijjt n tala n wawalen imaynuten i wmadal; ils-a deg reqrun ig âdan yugha di marra ilsan irumanen, ig idewlen d unsiben di watt’as n iwanaken n imenz’awen. Ilsan-a, min ghar tmmarnu teglinzit zi ssin tsawent, ucin-as i wmadal  ikmel awalen amaknaw auditoire, fantasie bla ca nned’ni.

Deg uraq-a umsaruf n illan deg ill agrakal, taârabt tuca ula nettat att’as n wawalen i wmadal. Awalen amaknaw  zéro/sifer, l’algèbre/aljibr, d ca n wawlen nned’ni n tudart n âla h’al amaknaw leqt'en, budenjal nigh d lexzin, nzemmar ad ten-nnaff di watt’as n ilsan n ssawalen iwdan id’a.

Amsaruf alsawan jar igduden n yill agrakal, ur d-yuci ca ghir awalen, yuci-d ula d ilsan amaknaw, ils afranji, ils-a ira ssawalen-t ilellen (ibeh’riyen) d isebbaben irupiyen, iturkiyen d iâraben deg isuggan n yill-a zi lweqt n umenghi ancaw ar umezwaru n lqarn XX. Ils afranji n Yill Agrakal, ghar-es lsas d arumani, maca day-es iferdisen zi tegrikit, taturkit d teârabt.

Ruxa, awal n ils afranji neqqar-it xmi nessawal x ilsan n umsawad’ jar n tnayen  nigh ktar n waggayen-nigh d iwdan- min ur ghar illi ils d ijj. Taramit d ijj n lmital x ilsan-a umi qqar-en ils afranji ira ssexdamen zik di wegmud’ yudsen d uftis ugmid’ n yill agrakal, ar wami is-tett’ef amcan taârabt zi lqarn VII.

Id’a taglinzit, d ils afranji itwassnen di wmadal att’as, maca din ula d ca n ilsan selh’en ula netnin i manaya amaknaw tanahwatlt/nahwatl, taswah’lit d takatit/kate, amullegh nsent yuca-d att’as n ibeddilen n ilsan inesliyen nned’ni.