Di Usiyanya ssawalen ca n 1.000 n ilsan, day-sen att’as n ccek mermi id nttas a ten-nsettef. Nzemmar ad nfarz jar n tlata n waggayen ilsawanen:

• Ilsan iwstruniziken/austronésiques
• Ilsan ur illin d iwstruniziken n Papwa - Ghinya Tamaynut
• Ilsan n Ustralya

Ca n imerzuten qqaren qa anetleâ amezwaru ikki-d zi Afrika, iwd’-ed ar tegzirt n Papwa d Ustralya. Mara newwi x manaya, nzemmar  ad naff amux qqaren ca n imuray ijjt n familya n ilsan ustraliyen d ijjt n familya  d tahindupasifikt, tesmun ula d tatasmanyat, ig immuten, d ilsan indamanisiyen

Ilsan iwstruniziken, immebd’an x tlata n tiggawyin tamilanizit/melanesi, tapulinizit/polinesi d tamikrunizit/micronesi llant di Pulinezya, Mikrunezya d Zilanda tamaynut. Amya, nettaf  imedya di tegzirt n Paskwa (Rapa Nuy) ar Zilanda Tamaynut (mawri). Tamalgaycit, ilsan issawalen di Madagaskar, ula d netta yudef di familya tawstrunizikit.

Asettef ines yussi-d âla h’sab tigzirin ig itt’ef waxxa ur zdigh-ent. Min icarken ilsan-a iwstruniziken itwassen deg iniggen imezwura n lqebtan Cook.

Ilsan ur illin d iwstruniziken n Papwa - Ghinya Tamaynut ssnen-ten drus n iwdan. Waxxa rebâad n imuray teqqnen-ten ar ttasmanyat d ilsan indamanisen, maca imuray nned’ni twaran ira ur din walu jar-asen. Deg waggay-a, munen takatit/kate, ira illan d ils afranji n watt’as n waggayen zdat n usuggi n tok pisin, d tadanit/dani itwassnen am ijj zi drus n ilsan n umadal mig llan tnayen n wawalen n yini.

Zi âlayen 750 n ilsan n Ustralya, ira ssawalen di tegrizt wami id-xeccen irupiyen, qqimen ghir 200, azgen ameqran nsen ssawalen-ten imessawalen imeggura.

Waxxa ira llan din ilsan inesliyen di Usiyanya, maca ur ggwaman ad tt’fen ixf nsen ak jjhed n isuggan, Usiyanya d amcan mani i tweddaren att’as ilsan inesliyen. Tasamuwat, ils unsib n Samoa issawalen ca 130.00 n iwdan twah’sab zi drus n ilsan inesliyen ig qqimen ddren.

Ila ijj n ils issedhac di Usiyanya, qqaren-as beach-la-mar, ixellet’ s teglinzit, tafransist, takastiyant d watt’as n ilsan inesliyen. Ils-a ssexdamen-t amaknaw ijjt n lqendart di tfughalt n Lpasifik mani ur ssiwilen tafransist. Ghar-es ula d amawal d tasekla.

Tafransist d teglinzit llan d ilsan  unsiben deg uzgen ameqran n iwanaken n Usiyanya. Kkes ghir di Vanuwatu, mani llan d unsiben ilsan n teglinzit, tafransist d tbislamt/el bislama, d Kalidunya Tamaynut nigh Pulinizya tafransist (Polynésie française), mani illa d unsib ils n tfransist, azgen ameqqran n iwanaken n Usiyanya ghar-sen taglinzit d ils unsib nsen. 

Tajapunit, tacinwit d thindit ula d netnin udfen di watt’as n imukan n Usiyanya amaknaw Haway, mani âad ruxa ssawalen tacinwit d tjapunit, nigh di tegzirin n Fiji mani âad llan imessawalen n thindit.
Min i tiqqimen d ilsan n Papwa Ghinya Tamaynut, awanek mani tella tamezla talsawant imeghren att’as deg umadal, axd’ar i d-as-ggin i tok pisin am ijj n ils d unsib izemmar ad yawi taxessart i yelsan n tmurt.

Taglinzit tessiwd’-anegh-d att’as n wawalen n Usiyanya. Zzag-sen ukelele (zi thawayant), tabou/leh’ram d tatouage/tiggaz (zi ils n Tunga) d kiwi (zi tmawrit). Zeg ilsan iwstraliyen, iwed’ed ghar tema n Yill Agrakal awal n bumerang, n illan di lasel d isem n ijj n waggay  n iwdan n ijj umkan n tmurt-nni, d ca n wawalen n luh’uc amaknaw dingo, koala d kanguru.